🇩🇪🇦🇫 குற்றப் பின்னணி இல்லாத ஆப்கானியரும் நாடு கடத்தல்… ஜேர்மனியின் புதிய நடவடிக்கையால் சர்ச்சை! ⚠️

🇩🇪 ஜேர்மனியின் புதிய குடிவரவுக் கொள்கை… ஆப்கானியர்களின் எதிர்காலம் கேள்விக்குறியா? ⚠️

ஜேர்மனியில் புகலிடக் கோரிக்கை நிராகரிக்கப்பட்ட ஆப்கானிஸ்தான் பிரஜைகளை மீண்டும் அந்நாட்டிற்கு நாடு கடத்தும் நடவடிக்கையை அந்நாட்டு அரசாங்கம் தீவிரப்படுத்தியுள்ளது. இதுவரை குற்றச்செயல்களில் ஈடுபட்டவர்கள் மட்டுமே நாடு கடத்தப்பட்டு வந்த நிலையில், தற்போது குற்றப் பின்னணி எதுவும் இல்லாத நபர்களும் ஆப்கானிஸ்தானுக்கு திருப்பி அனுப்பப்படுவது சர்வதேச ரீதியில் பெரும் சர்ச்சையையும் எதிர்ப்பையும் தோற்றுவித்துள்ளது.

📌 என்ன நடந்தது?

ஆப்கானிஸ்தானில் தலிபான்களின் ஆட்சியிலிருந்து தப்பித்து, சுமார் நான்கு ஆண்டுகளுக்கு முன்னர் ஜேர்மனிக்கு வருகை தந்தவர் 46 வயதான ஃபரிதூன் தோஃபான் (Faridoon Tofan). இவர் ஜேர்மனியில் தங்கியிருந்து பணியாற்றி வந்ததோடு, மொழியையும் கற்று வந்தார்.

எனினும், கடந்த ஏப்ரல் மாத நடுப்பகுதியில் இத்தாலிக்கான குறுகிய காலப் பயணமொன்றை மேற்கொண்டவேளை, எல்லைச் சோதனையின்போது அவர் அதிகாரிகளால் கைது செய்யப்பட்டு, முனிச் நகரில் உள்ள நாடு கடத்தல் தடுப்பு முகாமில் அடைக்கப்பட்டார்.

⚠️ நாடு கடத்தப்படுவதற்கான காரணம்

ஃபரிதூன் தோஃபானின் புகலிடக் கோரிக்கை ஏற்கனவே நிராகரிக்கப்பட்டிருந்ததுடன், அவரிடம் தற்காலிக தங்குமிளவுக் அனுமதி (Temporary Residence Permit) மட்டுமே இருந்தது. இந்த அனுமதி நாடு கடத்தலில் இருந்து சட்டப் பாதுகாப்பு வழங்குவதில்லை.

அவர் எந்தவொரு குற்றச் செயலிலும் ஈடுபடவில்லை என்பதோடு, பாதுகாப்பு அச்சுறுத்தலாகவும் அடையாளப்படுத்தப்படவில்லை. இருப்பினும், அவரது மேல்முறையீட்டு மனு கடந்த ஜூலை மாதம் இறுதியாக நிராகரிக்கப்பட்டதைத் தொடர்ந்து, அவரை காபூலுக்கு நாடு கடத்த நடவடிக்கைகள் எடுக்கப்பட்டு வருகின்றன.

🌍 குடும்பத்தினருக்கு உருவாகியுள்ள அச்சுறுத்தல்

ஃபரிதூன் தோஃபானின் மனைவியும் ஆறு பிள்ளைகளும் இன்னமும் காபூலிலேயே வசித்து வருகின்றனர். அண்மையில் தலிபான் அதிகாரிகள் அவர்களது வீட்டிற்குச் சென்று விசாரணை நடத்தியுள்ளதாக சர்வதேச மனித உரிமைகள் அமைப்பான ‘அம்னெஸ்டி இன்டர்நெஷனல்’ (Amnesty International) அமைப்பின் புகலிடச் சட்ட நிபுணர் நீனா அலிசாதே மரான்டி (Nina Alizadeh Marandi) தெரிவித்துள்ளார்.

ஜேர்மனி தலைநகர் பெர்லினிலுள்ள ஆப்கானிஸ்தான் தூதரக அதிகாரிகளை ஃபரிதூன் தோஃபான் சந்தித்ததைத் தொடர்ந்தே, காபூலில் உள்ள அவரது குடும்பத்தினரை தலிபான்கள் தேடிச் சென்றுள்ளனர். பெர்லினில் உள்ள தூதரகம் மற்றும் பொன் (Bonn) நகரிலுள்ள துணைத் தூதரகம் ஆகியன தற்போது தலிபான்களின் கட்டுப்பாட்டிலேயே இயங்கி வருகின்றன.

📝 அரசாங்கம் மீதான விமர்சனங்கள்

தலிபான் நிர்வாகத்தை ஜேர்மனி அரசாங்கம் உத்தியோகபூர்வமாக அங்கீகரிக்கவில்லை என்றாலும், “தொழில்நுட்ப மட்டத்தில்” தொடர்புகளைப் பேணி வருகிறது. நாடு கடத்தல் நடவடிக்கைகளைச் சாத்தியமாக்குவதற்காக ஜேர்மனி அரசு தலிபான் ஆட்சியாளர்களை மறைமுகமாக அங்கீகரிப்பதாக மனித உரிமை அமைப்புகளும் எதிர்க்கட்சிகளும் கடுமையான விமர்சனங்களை முன்வைத்து வருகின்றன.

📊 முன்னோடிச் சம்பவமும் வெடித்துள்ள போராட்டமும்

கடந்த செவ்வாய்க்கிழமை அதிகாலை 1:43 மணிக்கு, ‘ஃபிரீபேர்ட் எயர்லைன்ஸ்’ (Freebird Airlines) நிறுவனத்திற்குச் சொந்தமான ‘எயார்பஸ் ஏ320-214’ (Airbus A320-214) ரக விமானம் ஒன்று கிழக்குப் பகுதியிலுள்ள லைப்சிக்/ஹாலே (Leipzig/Halle) விமான நிலையத்திலிருந்து புறப்பட்டது.

துருக்கியின் ட்ராப்சோன் (Trabzon) நகர் ஊடாக காபூலை சென்றடைந்த அவ்விமானத்தில், குற்றச் செயல்களில் தண்டனை பெற்ற 30 ஆப்கானியர்களுடன் சேர்த்து, எந்தவொரு குற்றப் பின்னணியும் இல்லாத ஒரு ஆப்கானிய பிரஜையும் நாடு கடத்தப்பட்டார்.

குற்றப் பின்னணி இல்லாத நபர் ஒருவர் நாடு கடத்தப்பட்டமை ஒரு தவறான முன்உதாரணமாக அமையும் எனக்கூறி, இனவாதத்திற்கு எதிரான அமைப்புகள் ஏற்பாடு செய்த போராட்டத்தில் 260 க்கும் மேற்பட்டோர் விமான நிலையத்தின் புறப்படும் முனையத்தில் திரண்டு தீவிர போராட்டத்தில் ஈடுபட்டனர்.

💬 அமைச்சரின் விளக்கம்

இந்தக் கடுமையான விமர்சனங்களுக்கு பதிலளித்துள்ள ஜேர்மனியின் உள்துறை அமைச்சர் அலெக்சாண்டர் டோப்ரின்ட் (Alexander Dobrindt), புகலிடக் கோரிக்கை நிராகரிக்கப்பட்ட எவரும் நாட்டை விட்டு வெளியேற வேண்டும் என்பதே சட்டத்தின் விதிமுறை எனத் தெரிவித்தார்.

மத்திய அரசு தனது குடியேற்றக் கொள்கையில் தெளிவான பாதையுடனும் உறுதியான நிலைப்பாட்டுடனும் செயற்பட்டு வருவதாகவும், இந்த மாற்றங்களை விரைவுபடுத்தி வருவதாகவும் அவர் நியாயப்படுத்தியுள்ளார்.

📈 பாதுகாப்பு நிலைமை தொடர்பான முரண்பாடுகள்

2024 ஆம் ஆண்டு முதல் ஜேர்மனியிலிருந்து 200 க்கும் மேற்பட்ட ஆப்கானியர்கள் திருப்பி அனுப்பப்பட்டுள்ளனர். இதில் குறைந்தது ஒருவராவது காபூல் சென்றடைந்த பின்னர் கொல்லப்பட்டுள்ளதாக அம்னெஸ்டி இன்டர்நெஷனல் சுட்டிக்காட்டியுள்ளது.

இருப்பினும், ஆப்கானிஸ்தானில் ஆண்களின் பாதுகாப்பு நிலைமை கணிசமாக முன்னேறியுள்ளதாக ஐக்கிய நாடுகளின் சர்வதேச புலம்பெயர்ந்தோர் அமைப்பு (IOM) தெரிவித்துள்ளது. அதேவேளை, தற்போதைய சூழ்நிலையில் பெண்கள் ஆப்கானிஸ்தானுக்குத் திரும்புவது பாதுகாப்பற்றது என்றும் அமைப்புகள் எச்சரித்துள்ளன.

⏳ எதிர்க்கட்சிகளின் கடும் எதிர்ப்பு

ஜேர்மனி அரசின் இந்த நடவடிக்கையை கிரீன் கட்சியின் உள்துறை பேச்சாளர் மார்செல் எம்மரிச் (Marcel Emmerich) கடுமையாகச் சாடியுள்ளார். “எந்தத் தவறும் செய்யாதவர்களை ஆப்கானிஸ்தானுக்கு நாடு கடத்துவது பொறுப்பற்ற செயலாகும். இந்த ஆபத்தான நடவடிக்கை தலிபான்களை பலப்படுத்துவதுடன், ஜேர்மனியின் பாதுகாப்பிற்கும் அச்சுறுத்தலாக அமையும்,” என அவர் எச்சரித்துள்ளார்.

அத்துடன், ஜேர்மனி அரசாங்கம் மனித உரிமைகள் பிரகடனங்களை புறந்தள்ளிவிட்டு இத்தகைய கடுமையான நடவடிக்கைகளில் ஈடுபடுவதை நிறுத்த வேண்டும் என மனித உரிமை அமைப்புகள் தொடர்ச்சியாக வலியுறுத்தி வருகின்றன.

#BreakingNews #GermanyNews #Afghanistan #Deportation #ImmigrationPolicy #HumanRights #WorldNews #TamilKlik