🇫🇷 🚨 பாரிஸில் மின்சார ஸ்கூட்டர் செலுத்துபவர்களுக்கு ஹெல்மெட் கட்டாயமாக்கம்… மீறினால் அபராதம்! 🛵

🇫🇷 ⚠️ மோட்டார் சைக்கிள்களை விட மின்சார ஸ்கூட்டர்கள் ஆபத்தானவையா? பாரிஸில் புதிய சட்டம்! 🚲🛵

பிரான்ஸ் தலைநகர் பாரிஸில் மின்சார ஸ்கூட்டர்கள் (e-scooters) மற்றும் அது சார்ந்த வாகனங்களைச் செலுத்துபவர்கள் இனி கட்டாயமாக தலைக்கவசம் (ஹெல்மெட்) மற்றும் பிரதிபலிப்பு ஆடைகளை (reflective gear) அணிய வேண்டும் என காவல்துறை உத்தரவிட்டுள்ளது. விபத்துக்கள் மற்றும் தலைக்காயப் பாதிப்புகள் கணிசமாக அதிகரித்துள்ளதைத் தொடர்ந்தே இந்த புதிய கட்டுப்பாடுகள் கொண்டுவரப்பட்டுள்ளன.

🇫🇷 📌 புதிய பாதுகாப்பு விதிகள்

பாரிஸ் மற்றும் அதன் புறநகர் பகுதிகளில் நடைமுறைக்கு வந்துள்ள இந்த புதிய சட்டத்தின்படி, மின்சார ஸ்கூட்டர்கள், செக்வேக்கள் (Segways) மற்றும் ஹோவர்போர்டுகள் (hoverboards) உள்ளிட்ட அனைத்து தனிநபர் மோட்டார் வாகனங்களுக்கும் இக்கட்டுப்பாடுகள் பொருந்தும்.

பொது வீதிகளில் பயணிக்கும் போது தலைக்கவசம் அணியத் தவறினால் 135 யூரோக்களும் (£116), பிரதிபலிப்பு ஆடை அணியாவிட்டால் 35 யூரோக்களும் (£30) அபராதமாக விதிக்கப்படும் என பாரிஸ் காவல்துறை எச்சரித்துள்ளது.

⚠️ அதிகரிக்கும் விபத்துக்களும் உயிரிழப்புகளும்

பாதுகாப்பு காரணங்களைக் கருத்தில் கொண்டு 2023ஆம் ஆண்டு பாரிஸில் வாடகை மின்சார ஸ்கூட்டர்களுக்குத் தடை விதிக்கப்பட்ட போதிலும், சொந்தமாக வைத்துப் பயன்படுத்துவோரின் எண்ணிக்கை தொடர்ந்து அதிகரித்து வருகிறது.

கடந்த ஆண்டில் மட்டும் பாதசாரிகள், மிதிவண்டி செலுத்துபவர்கள் மற்றும் மின்சார ஸ்கூட்டர் பயனாளர்கள் உட்பட 79 பேர் வீதி விபத்துக்களில் உயிரிழந்துள்ளனர். இது அதற்கு முந்தைய ஆண்டின் 45 உயிரிழப்புகளுடன் ஒப்பிடுகையில் கடுமையான உயர்வாகும். மேலும், 2025ஆம் ஆண்டில் 1,100க்கும் மேற்பட்டோர் பலத்த காயமடைந்துள்ளதாகவும் காவல்துறை தரவுகள் தெரிவிக்கின்றன.

🇬🇧 📊 ஆய்வில் வெளியான திடுக்கிடும் தகவல்

இதேவேளை, பிரித்தானியாவில் மேற்கொள்ளப்பட்ட புதிய ஆய்வொன்றில், மோட்டார் சைக்கிள் விபத்துக்களை விட மின்சார ஸ்கூட்டர் விபத்துக்களில் சிக்குபவர்களுக்கு மூளையில் பலத்த காயம் (traumatic brain injury) ஏற்படுவதற்கான சாத்தியக்கூறு 3.5 மடங்கு அதிகமாக உள்ளதாகக் கண்டறியப்பட்டுள்ளது.

இங்கிலாந்து மற்றும் வேல்ஸில் உள்ள 18 தீவிர சிகிச்சை மையங்களில் சிகிச்சை பெற்ற 15,000க்கும் மேற்பட்ட நோயாளிகளின் தரவுகளை பகுப்பாய்வு செய்து மருத்துவர் டேவிட் போடான்ஸ்கி தலைமையிலான குழுவினர் இந்த அதிர்ச்சி தகவலை வெளியிட்டுள்ளனர்.

🇪🇺 🌍 ஐரோப்பிய நாடுகளின் கடும் நடவடிக்கைகள்

மின்சார ஸ்கூட்டர்களின் பயன்பாட்டைக் கட்டுப்படுத்த பிற ஐரோப்பிய நகரங்களும் தீவிர நடவடிக்கைகளை எடுத்து வருகின்றன.

ஸ்பெயினின் மட்ரிட் நகரம் 2024இல் வாடகை மின்சார ஸ்கூட்டர்களுக்குத் தடை விதித்த நிலையில், பெல்ஜியத்தின் பிரஸ்ஸல்ஸ் நகரமும் விரைவில் இத்தகைய தடைகளை அமல்படுத்தவுள்ளதாக அறிவித்துள்ளது.

#Paris #France #EScooter #RoadSafety #Europe #TrafficRules #WorldNews #TamilKlik