⚠️🇭🇰 வட்ஸ்அப் குரல் பதிவை நம்பி ஏமாற வேண்டாம்… HK$ 10 மில்லியனை இழந்த அதிர்ச்சி சம்பவம்! 📱
கொங் கொங்கைச் சேர்ந்த நபர் ஒருவர், செயற்கை நுண்ணறிவு (AI) தொழில்நுட்பத்தைப் பயன்படுத்தி வட்ஸ்அப்பில் மேற்கொள்ளப்பட்ட அதிநவீன மோசடி ஒன்றில் சிக்கி 10 மில்லியன் கொங் கொங் டொலர்களை (சுமார் 1.27 மில்லியன் அமெரிக்க டொலர்கள் / இலங்கை ரூபாயில் சுமார் 42 கோடி) இழந்துள்ளார்.
வட்ஸ்அப்பில் வந்த குரல் பதிவுகளை (Voice messages) நம்பி, தனது ஆயுள் சேமிப்பு முழுவதையும் அவர் மோசடிக்காரர்களிடம் பறிகொடுத்துள்ள சம்பவம் பெரும் அதிர்ச்சியை ஏற்படுத்தியுள்ளது.
📌 என்ன நடந்தது?
கொங் கொங் பொலிஸாரின் இணையப் பாதுகாப்புத் தளமான ‘சைபர்டிஃபென்டர்’ (Cyberdefender) வெளியிட்டுள்ள தகவலின்படி, பாதிக்கப்பட்ட நபருக்கு அவரது தந்தையின் குரலில் வட்ஸ்அப் ஊடாக அவசர குரல் பதிவு ஒன்று வந்துள்ளது. அதில், அவசரமாக 1 மில்லியன் கொங் கொங் டொலர்களை (சுமார் 1,27,000 அமெரிக்க டொலர்கள்) மாற்றுமாறு கோரப்பட்டிருந்தது.
அக்குரல் பதிவில் இருந்த குரலும் பேசும் பாணியும் தனது தந்தையை அப்படியே உரித்து வைத்திருந்ததால், அதனை உண்மை என நம்பிய அந்த நபர் பணத்தை அனுப்பியுள்ளார். இதே முறையில் தொடர்ந்து ஏமாற்றப்பட்ட அவர், இறுதியில் தனது முழுச் சேமிப்பான 10 மில்லியன் கொங் கொங் டொலர்களையும் இழந்துள்ளார்.
💬 பொலிஸார் வழங்கும் முக்கிய எச்சரிக்கை
இந்தச் சம்பவம் தொடர்பாக எச்சரிக்கை விடுத்துள்ள கொங் கொங் பொலிஸார், “குரல் பதிவுகளைக் கண்மூடித்தனமாக நம்ப வேண்டாம். குரல் ஒன்றாகவே கேட்டாலும், அது உண்மையானது என்று அர்த்தமல்ல,” எனத் தெரிவித்துள்ளனர்.
சந்தேகத்திற்கிடமான குரல் பதிவுகள் அல்லது அழைப்புகள் வந்தால், உடனடியாக அழைப்பைத் துண்டித்துவிட்டு, அந்த உறவினரையோ அல்லது நண்பரையோ நேரடியாகத் தொலைபேசியில் அழைத்து உறுதிப்படுத்துமாறு பொலிஸார் அறிவுறுத்தியுள்ளனர்.
மேலும், சாதனங்களில் ‘இரு காரணி சரிபார்ப்பு’ (Two-factor authentication) முறையைச் செயற்படுத்துமாறும், கணக்குகளுடன் இணைக்கப்பட்டுள்ள சாதனங்களின் பட்டியலை அடிக்கடி பரிசீலித்து, இனந்தெரியாத சாதனங்களை உடனடியாக நீக்குமாறும் கேட்டுக்கொண்டுள்ளனர்.
⚠️ AI மோசடியில் இருந்து தப்பிப்பது எப்படி?
இத்தகைய ‘டீப்ஃபேக்’ மோசடிகள், நமக்கு நன்கு தெரிந்த மற்றும் நம்பிக்கைக்குரிய நபர்களின் பெயரில் வருவதனாலேயே அதிக பாதிப்பை ஏற்படுத்துகின்றன. இதிலிருந்து தப்பிக்கப் பாதுகாப்பு நிபுணர்கள் எளிய ஆனால் மிகவும் பயனுள்ள வழி ஒன்றைப் பரிந்துரைக்கின்றனர்.
அவசர காலங்களில் பயன்படுத்துவதற்காகக் குடும்ப உறுப்பினர்கள் அல்லது நெருங்கிய நண்பர்களுடன் ஒரு ‘ரகசிய வார்த்தையை’ (Secret Codeword) அமைத்துக் கொள்ள வேண்டும். மோசடிக்காரர்கள் உங்கள் குரலைப் போல போலியாகப் பேச முடிந்தாலும், உங்கள் மனதில் உள்ள ரகசியத்தை அவர்களால் அறிய முடியாது.
🔍 கவனிக்க வேண்டிய 3 முக்கிய அறிகுறிகள்
மோசடிக்காரர்கள் பதற்றத்தை உருவாக்கி, யோசிப்பதற்கு நேரமளிக்காமல் உடனடியாக முடிவெடுக்க வைப்பதையே பிரதான உத்தியாகப் பயன்படுத்துகின்றனர்.
இத்தகைய மோசடிகளைக் கண்டறிய 3 முக்கிய அறிகுறிகளைக் கவனிக்க வேண்டும் எனச் சட்ட நிபுணர்கள் தெரிவிக்கின்றனர்:
- அவசரப்படுத்துதல்: உடனடியாகப் பணம் அனுப்புமாறு கடுமையான அழுத்தத்தைக் கொடுத்தல்.
- கண்டறிய முடியாத பணப் பரிமாற்றம்: ரொக்கம், கிரிப்டோகரன்சி (Cryptocurrency) அல்லது கிஃப்ட் கார்டுகள் மூலம் பணம் கோருதல்.
- யாரையும் தொடர்புகொள்ள விடாமல் தடுத்தல்: வேறு எவருடனும் பேச விடாமல் கட்டுப்பாட்டில் வைத்திருக்க முயலுதல்.
அந்நியர்களிடமிருந்தோ அல்லது உறவினர்களிடமிருந்தோ திடீரென அசாதாரண கோரிக்கைகளுடன் குரல் பதிவுகளோ அல்லது அழைப்புகளோ வந்தால், சற்று நிதானமாக யோசித்து, ரகசிய வார்த்தையைக் கேட்டு உறுதிப்படுத்திய பின்னரே அடுத்தகட்ட நடவடிக்கையை எடுக்க வேண்டும்.
#WhatsAppScam #AIFraud #Deepfake #HongKong #CyberSecurity #TechNews #ScamAlert #TamilKlik
