✈️ உயிர்தப்பிய பயணிக்கு நேரடியாக ஆறுதல் கூறுவதற்குப் பதிலாக… ‘மீண்டும் பதிவு செய்யக் கோரி’ மின்னஞ்சல் அனுப்பிய ரயன்எயார்!
பறந்து கொண்டிருந்த விமானத்தின் ஜன்னல் உடைந்ததில் 15,000 அடி உயரத்தில் பகுதி அளவுக்கு வெளியே இழுக்கப்பட்ட பயணியின் குடும்பத்திற்கு, “பயணத்தை மீண்டும் முன்பதிவு செய்ய விரும்புகிறீர்களா?” என ரயன்எயார் (Ryanair) நிறுவனம் மின்னஞ்சல் மூலம் அழைப்பு விடுத்து அதிர்ச்சியை ஏற்படுத்தியுள்ளது.
கடந்த ஜூலை 10 ஆம் திகதி கிரீஸின் தெசலோனிகியிலிருந்து ஜெர்மனியின் மெமிங்கனுக்குப் பயணித்த FR1879 எனும் விமானத்திலேயே இந்தத் திடுக்கிடும் சம்பவம் இடம்பெற்றுள்ளது.
📌 நடுவானில் உடைந்த ஜன்னல்… நடந்தது என்ன?
செர்பிய தொழிலதிபரான 61 வயதுடைய லுபிசா கரோவிக் (Ljubisa Karovic), போயிங் 737 (Boeing 737) ரக விமானத்தில் மேலதிக கட்டணம் செலுத்தாமல் கிடைத்த 11F எனும் ஜன்னல் ஓர இருக்கையில் பயணித்துள்ளார். விமானம் புறப்பட்டு சுமார் 20 நிமிடங்களில், 15,000 அடி உயரத்தில் மணிக்கு 500 மைல் வேகத்தில் பறந்து கொண்டிருந்தபோது, குண்டு வெடிப்பது போன்ற சத்தத்துடன் அருகில் இருந்த ஜன்னல் திடீரென உடைந்து நொறுங்கியுள்ளது.
காற்றழுத்தக் குறைவு காரணமாக கரோவிக்கின் தலை, வலது தோள்பட்டை மற்றும் கை என்பன உடனடியாக விமானத்தின் உடற்பகுதிக்கு வெளியே இழுக்கப்பட்டுள்ளன. உடனடியாகச் செயற்பட்ட அவரது மனைவி ஸ்வெட்லானா மற்றும் சக பயணிகள், அவரது கால்களைப் பிடித்து சுமார் இரண்டு நிமிடங்கள் போராடி அவரை மீண்டும் விமானத்திற்குள் இழுத்துள்ளனர். காற்று உராய்வு காரணமாகக் காயங்களுக்கு உள்ளான கரோவிக், அதிர்ச்சியில் உடனடியாக மயக்கமடைந்துள்ளார்.
💬 📩 ‘மீண்டும் பதிவு செய்யக் கோரும்’ மின்னஞ்சல்… பாதிக்கப்பட்ட பயணி கொந்தளிப்பு
உயிர்த்தப்பிய பயணிக்கு நேரடியாக ஆறுதல் கூறுவதற்குப் பதிலாக, பயணச்சீட்டை முன்பதிவு செய்த அவரது மகனுக்கு ரயன்எயார் நிறுவனம் மின்னஞ்சல்களை அனுப்பியுள்ளது.
இது தொடர்பில் கருத்துத் தெரிவித்துள்ள லுபிசா கரோவிக்:
“எனது மகனுக்கு மின்னஞ்சல் அனுப்பி, ரத்து செய்யப்பட்ட பயணத்தை மீண்டும் பதிவு செய்ய (Rebook) விரும்புகிறீர்களா என்றும் நான் எப்படி இருக்கிறேன் என்றும் கேட்டுள்ளனர். ஆனால் நிறுவனத்திலிருந்து ஒருவர் கூட என்னை நேரடியாகத் தொடர்புகொள்ளவோ, தொலைபேசி அழைப்பு மூலமாக ஆறுதல் கூறவோ இல்லை,” எனக் கவலை வெளியிட்டுள்ளார்.
சம்பவத்தின் போது விமானப் பணிப்பெண்கள் உதவிக்கு வராமல் பயந்து தங்களது இருக்கைகளிலேயே அமர்ந்திருந்ததாகக் குற்றம்சாட்டியுள்ள அவரது மனைவி, ரயன்எயார் நிறுவனத்தின் இந்த அணுகுமுறை அருவருப்பானது எனச் சாடியுள்ளார்.
📈 அதிகாரிகள் தரப்பு விளக்கம் மற்றும் விசாரணை
இதனிடையே, விமானத்தைப் பாதுகாப்பாகத் தரையிறக்கி அனைத்துப் பயணிகளையும் காப்பாற்றிய தங்களது பணிப்பெண்கள் மிகச்சிறப்பாகச் செயற்பட்டதாக ரயன்எயார் நிறுவனத்தின் நிதிப் பணிப்பாளர் நீல் சொரஹான் தெரிவித்துள்ளார்.
இச்சம்பவம் குறித்து அமெரிக்காவின் தேசிய போக்குவரத்து பாதுகாப்பு சபை (NTSB) விசாரணைகளை ஆரம்பித்துள்ள நிலையில், பாதிக்கப்பட்ட தம்பதியினருக்கு உரிய இழப்பீட்டைப் பெற்றுத்தர சட்ட நடவடிக்கை எடுக்கப்பட்டு வருவதாக அவர்களின் சட்டத்தரணி தெரிவித்துள்ளார்.
#Ryanair #AviationSafety #Boeing737 #FlightAccident #WorldNews #TravelNews #TamilKlik
