🇷🇺🚢 ஐரோப்பிய நாடுகளுக்கு ரஷ்யாவின் அதிரடி எச்சரிக்கை… ‘கடற்கொள்ளை’ நடவடிக்கைக்குப் பதிலடி கொடுக்கப் புடின் உத்தரவு! 🇷🇺
ரஷ்யாவின் சட்டவிரோத எண்ணெய் தாங்கிக் கப்பல்கள் (Shadow fleet) மீது பிரித்தானியா மற்றும் ஐரோப்பிய ஒன்றியம் (EU) எடுத்து வரும் தீவிர நடவடிக்கைகளுக்குப் பதிலடியாக, பிரித்தானிய வணிகக் கப்பல்களைக் கைப்பற்றப் போவதாக ரஷ்ய ஜனாதிபதி விளாடிமிர் புடின் (Vladimir Putin) பகிரங்க எச்சரிக்கை விடுத்துள்ளார்.
ரஷ்யாவின் போருக்கான வருவாயை முடக்கும் நோக்கில், அந்நாட்டின் எண்ணெய் தாங்கிக் கப்பல்களைக் கைப்பற்றுவதற்கும் தடைகளை அதிகரிப்பதற்கும் பிரித்தானியாவும் ஐரோப்பிய ஒன்றியமும் உத்தரவிட்டுள்ளன. கடலில் கைப்பற்றப்படும் எண்ணெய் மற்றும் சரக்குகளை ஏலம் விட்டு விற்பனை செய்ய அனுமதிக்கும் புதிய தடைகள் கடந்த மாதம் அமல்படுத்தப்பட்டன.
பசிபிக் கடற்படைப் பயிற்சியில் புடின் எச்சரிக்கை
பசிபிக் பெருங்கடலில் நடைபெற்ற கடற்படைப் பயிற்சியின் போது ராணுவச் சீருடையில் தோன்றிய விளாடிமிர் புடின், ரஷ்யாவின் வணிகக் கப்பல்களைக் கைப்பற்றும் பிரித்தானியா மற்றும் ஐரோப்பிய ஒன்றியத்தின் நடவடிக்கையை “கடற்கொள்ளை” (Piracy) என வர்ணித்தார்.
இது குறித்துப் பேசிய அவர்:
“சில நாடுகளின் அதிகாரிகள் சர்வதேச கடல்சார் சட்டங்களை மீறி, எங்களது வணிகக் கப்பல்களின் நடமாட்டத்தைக் கட்டுப்படுத்த முயல்வதையும், எங்களது கப்பல்களைக் கைப்பற்றிச் சொத்துக்களைச் சூறையாட நினைப்பதையும் நாம் காண்கிறோம். இது நிச்சயமாகக் கடற்கொள்ளை மற்றும் கொள்ளையடிக்கும் செயலாகும். இதைப் நடைமுறைப்படுத்தத் தொடங்கினால், நாங்களும் அதே வழியில் பதிலடி கொடுக்க நிர்பந்திக்கப்படுவோம். அது எங்கள் கப்பல்கள் தாக்கப்பட்ட கடற்பரப்பில் தான் இருக்க வேண்டும் என்பதில்லை; நாங்கள் அவசியமானது என நினைக்கும் எந்தவொரு கடற்பரப்பிலும் பதிலடி கொடுப்போம்,” என எச்சரித்துள்ளார்.
பிரித்தானியா மற்றும் பிரான்ஸ் இலக்குகள்
ரஷ்யாவின் பசிபிக் கடற்படைத் தளபதி அட்மிரல் விக்டர் லீனா (Viktor Liina), ‘Shadow fleet’ கப்பல்களைக் கைப்பற்றுவதில் ஈடுபட்டுள்ள பிரித்தானியா மற்றும் பிரான்ஸ் ஆகிய நாடுகளே தங்களது முதன்மை இலக்குகள் எனக் குறிப்பிட்டுள்ளார்.
ஆசியா-பசிபிக் கடல்சார் வர்த்தகப் பாதைகள், அங்கு செல்லும் சரக்குக் கப்பல்கள் மற்றும் அவற்றின் உரிமையாளர்கள் பற்றிய உளவுத் தகவல்களைத் தங்களது கடற்படை சேகரித்து வருவதாக அவர் கூறினார். தெற்கு குரில் தீவுகள் (South Kuril Islands) வழியாகச் சென்ற 1,001 கப்பல்களில் 379 கப்பல்கள் “நட்பற்ற நாடுகளுக்குச்” (Unfriendly states) சொந்தமானவை என்றும், அதில் 26 கப்பல்கள் பிரித்தானியாவுக்கும் 9 கப்பல்கள் பிரான்ஸுக்கும் சொந்தமானவை என்றும் அவர் புடினிடம் தெரிவித்தார்.
பிரித்தானியாவின் பாதுகாப்பு நடவடிக்கை
இது குறித்து கருத்து தெரிவித்த மொஸ்கோவுக்கான முன்னாள் பிரித்தானிய பாதுகாப்புப் பிரதிநிதி ஜோன் ஃபோர்மேன் (John Foreman), ரஷ்யா இவ்வாறு பதிலடி கொடுப்பதற்கான ஆபத்து ஆரம்பத்திலிருந்தே இருப்பதாகத் தெரிவித்தார். இந்த ஆபத்து குறித்து பிரித்தானிய கடற்படையும் பாதுகாப்பு அமைச்சும் (MoD) விழிப்புடன் இருப்பதுடன், கப்பல் உரிமையாளர்களுடன் இணைந்து முன்னெச்சரிக்கை நடவடிக்கைகளை எடுத்து வருவதாகவும் அவர் குறிப்பிட்டார்.
போலி கொடிகளைப் பயன்படுத்திச் செல்லும் ‘Shadow fleet’ கப்பல்களைச் சர்வதேச கடல்சார் சட்டத்தின்படி (UNCLOS Article 110) சோதனையிட பிரித்தானியாவுக்கு உரிமை உண்டு என்றும், புடினின் இந்த அச்சுறுத்தல் வரவிருக்கும் ரஷ்ய நாடாளுமன்றத் தேர்தலை முன்னிட்டுத் தன்னை ஒரு பலமான தலைவராகக் காட்டிக்கொள்வதற்காக விடுக்கப்பட்ட அரசியல் பிரச்சாரமாக இருக்கலாம் என்றும் அவர் சுட்டிக்காட்டினார்.
பிரித்தானிய அரசாங்கத்தின் பேச்சாளர் ஒருவர் கருத்து தெரிவிக்கையில்:
“உக்ரைன் மீதான ரஷ்யாவின் போருக்குத் தீனியிடும் ரஷ்ய நிழற்படைக் கப்பல்களின் தீங்கிழைக்கும் நடவடிக்கைகளை பிரித்தானியா தொடர்ந்து முடக்கி வருகிறது. பிரித்தானிய ஆயுதப்படைகளும் சட்ட அமலாக்க அதிகாரிகளும் சர்வதேச கடல்சார் சட்டங்களுக்கு முற்றுமுழுதாக அமைவாகவே செயற்படுகின்றனர்,” எனத் தெளிவுபடுத்தியுள்ளார்.
#RussiaNews #VladimirPutin #UKNews #RoyalNavy #ShadowFleet #AviationNews #WorldNews #TamilKlik
