🛑 🌡️கடும் வெப்ப அலைகளுக்குப் பயந்து இரண்டு பிரதான சுற்றுலாத் தலங்களை புறக்கணிக்கத் தயாராகும் பிரித்தானிய சுற்றுலாப் பயணிகள்!✈️

🌡️ 🧳 ஸ்பெயின், போர்த்துக்கலுக்குப் பதிலாக நோர்வே, சுவீடன்: வெப்பத்தைத் தவிர்த்து குளிர்ந்த நாடுகளைத் தேடும் சுற்றுலாப் பயணிகள்!

பிரித்தானியாவிலும் ஐரோப்பாவிலும் கடும் வெப்பம் மேலும் அதிகரிக்கக்கூடும் என காலநிலை நிபுணர்கள் எச்சரித்துள்ள நிலையில், பிரித்தானிய சுற்றுலாப் பயணிகள் தங்களின் வழக்கமான சுற்றுலாத் தலங்கள் குறித்து மறுபரிசீலனை செய்யத் தொடங்கியுள்ளனர். தெற்கு மற்றும் மத்திய ஐரோப்பாவின் அதீத வெப்பத்தைத் தவிர்த்து, மிதமான மற்றும் சௌகரியமான வெப்பநிலையைக் கொண்ட நாடுகளை நோக்கி பிரித்தானியப் பயணிகள் ஈர்க்கப்பட்டு வருவதாகப் பல நிபுணர்கள் சுட்டிக்காட்டியுள்ளனர். ✈️

இந்த புதிய பயணப் போக்குக்கு ‘கூல்ஹொலிடே’ (Coolcations – குளிர்ந்த இடங்களுக்குச் சுற்றுலாச் செல்லல்) எனப் பெயரிடப்பட்டுள்ளது. பிரித்தானிய சுற்றுலாப் பயணிகள் தாங்கள் வசிக்கும் நாட்டில் நிலவும் வெப்பநிலையை விடக் குறைவான, சௌகரியமான காலநிலை நிலவும் இடங்களைத் தேடிச் செல்லத் தொடங்கியுள்ளனர். பிரித்தானியர்களின் அபிமான சுற்றுலாத் தலங்களான ஸ்பெயினும் (Spain) போர்த்துக்கலும் (Portugal) இந்த ஆண்டில் ஐரோப்பாவின் மிக வெப்பமான நாடுகளாக மாறியுள்ளன. இவ்விரு நாடுகளினதும் சுற்றுலா மையங்களில் இந்த கோடைகாலத்தில் வெப்பநிலை 40 பாகை செல்சியஸுக்கும் (40C) அதிகமாகப் பதிவாகியுள்ளது. 🌡️

பொதுவாக பிரித்தானியர்கள் தங்களின் கோடைகால விடுமுறையைக் கழிப்பதற்கு அதிக வெப்பமும் சூரிய வெளிச்சமும் உள்ள இடங்களையே தேர்ந்தெடுப்பார்கள். எனினும், தற்போது தங்களின் சொந்த நாட்டிலேயே நிலவும் கடும் வெப்ப அலைகள் காரணமாக, அவர்கள் மேலும் வெப்பமான இடங்களுக்குச் செல்வதை விரும்பவில்லை. இதனால் குளிர்ந்த காலநிலை நிலவும் பகுதிகள் அவர்களைக் கவர்ந்துள்ளன. ‘டெய்லி எக்ஸ்பிரஸ்’ (Daily Express) ஊடகத்துடன் பகிர்ந்துகொள்ளப்பட்ட தரவுகள், மக்களின் இந்த பயண மனநிலை மாற்றத்தையும் அவர்கள் பரிசீலிக்கும் புதிய இடங்களையும் வெளிப்படுத்தியுள்ளன. 🧳

🌡️ 30 சதவீதமானோர் குளிர்ந்த இடங்களைத் தெரிவு செய்கின்றனர்

‘Multitrip.com’ என்ற பயணக் காப்புறுதி நிறுவனத்தின் புதிய ஆய்வின்படி, பிரித்தானிய சுற்றுலாப் பயணிகளில் 30 சதவீதமானோர் ஏற்கனவே குளிர்ந்த நாடுகளைத் தேர்ந்தெடுக்கத் தொடங்கிவிட்டதாகத் தெரிவித்துள்ளனர். 🏝️

இதேவேளை, ‘Hatch’ நிறுவனத்தின் பயணப் பிரிவுத் தலைவர் டெய்சி விற்றேக்கர் (Daisie Whitaker) தெரிவிக்கையில், பிரித்தானியாவிலும் ஐரோப்பாவிலும் வெப்பநிலை அதிகரித்து வருவதால் சில குறிப்பிட்ட நாடுகளுக்கான தேவை அதிகரித்துள்ளதாகக் குறிப்பிட்டுள்ளார். கடந்த ஆண்டுடன் ஒப்பிடுகையில் சுவீடனுக்கான (Sweden) சுற்றுலா ஆர்வம் 1.2 சதவீதத்தால் அதிகரித்துள்ளதுடன், நோர்வே (Norway), சுவிற்சர்லாந்து (Switzerland) மற்றும் ஐஸ்லாந்து (Iceland) ஆகிய நாடுகளுக்கான தேவையும் கணிசமாக உயர்ந்துள்ளது. ✈️

பிரித்தானிய சுற்றுலாப் பயணிகள் தங்களின் பயணத் திட்டங்களை மாற்றியமைத்து வருவதைத் தொடர்ந்து, நிபுணர்களும் சில பரிந்துரைகளை வழங்கியுள்ளனர். உதாரணத்திற்கு, ‘HotelPlanner’ நிறுவனத்தின் தலைமை நிர்வாக அதிகாரி டிம் ஹென்ஷெல் (Tim Hentschel), போர்த்துக்கலின் லிஸ்பன் (Lisbon) நகரிற்குப் பதிலாக அயர்லாந்தின் கால்வே (Galway) நகரிற்கும், ஸ்பெயினின் பார்சிலோனா (Barcelona) நகரிற்குப் பதிலாக நோர்வேயின் பேர்கன் (Bergen) நகரிற்கும் செல்லுமாறு மக்களுக்கு ஆலோசனைக் கூறியுள்ளார்.

🧳 வெப்ப அலைகளின் போது இரட்டிப்பாகும் பனிப்பிரதேசப் பயணங்கள்

தனிநபர் பயண நிறுவனமான ‘Flash Pack’ இன் இணை நிறுவனர் லீ தொம்சன் (Lee Thompson) கூறுகையில், பிரித்தானியாவில் கடும் வெப்ப அலை ஏற்படும் போதெல்லாம் தங்களது நிறுவனத்தின் குளிர்காலப் பயணங்களுக்கான முன்பதிவுகள் பெருமளவில் அதிகரிப்பதாகத் தெரிவித்துள்ளார். “அதிக வெப்பம் நிலவும் ஒரு நாளில், குளிர்காலப் பயணங்களுக்கான எங்களது விற்பனை வழமையான நாட்களை விட இரட்டிப்பாகின்றது” என அவர் குறிப்பிட்டுள்ளார். ✈️

“பின்லாந்து (Finland), ஐஸ்லாந்து (Iceland) மற்றும் அண்டார்டிகா (Antarctica) போன்ற இடங்களுக்கான பயணங்கள் கணிசமான உயர்வைச் சந்திக்கின்றன. பயணிகள் இந்த அதீத வெப்பத்திலிருந்து எவ்வளவு தூரம் தப்பிச்செல்ல முடியுமோ அவ்வளவு தூரம் செல்ல விரும்புகின்றனர். கோடைகாலத்தின் உச்சக்கட்டத்தில் தெற்கு ஐரோப்பியப் பகுதிகளுக்குப் பயணம் செய்வது குறித்து மக்கள் அவதானமாகச் சிந்திக்க வேண்டும். நீங்கள் வெளியில் சென்று இடங்களைப் பார்வையிடவோ அல்லது வெளிப்புற நடவடிக்கைகளில் ஈடுபடவோ விரும்பினால், இந்த உக்கிரமான வெப்பம் அதனை மிகவும் சவாலானதாக மாற்றிவிடும்” என்றும் அவர் எச்சரித்துள்ளார். 🌡️

இதேவேளை, ‘Welcome Pickups’ நிறுவனத்தின் இணை நிறுவனர் அலெக்ஸ் திரிமிஸ் (Alex Trimis) தெரிவிக்கையில், ரோம் (Rome), ஏதென்ஸ் (Athens), செவில் (Seville), நேப்பில்ஸ் (Naples) மற்றும் அந்தாலியா (Antalya) போன்ற நகரங்களுக்கு வரும் சுற்றுலாப் பயணிகள் அங்குள்ள வெப்பத்தை எதிர்கொள்ளத் தயாரற்ற நிலையில் வருவதாகக் குறிப்பிட்டுள்ளார். இந்நகரங்களில் ஜூலை மற்றும் ஆகஸ்ட் மாதங்களில் வெப்பநிலை 40 பாகை செல்சியஸைத் தாண்டுவதுடன், காற்றில் உள்ள ஈரப்பதம், அதிக மக்கள் கூட்டம் மற்றும் நகரங்களின் உஷ்ண விளைவு (urban heat effect) என்பன நிலைமையை மேலும் மோசமாக்குகின்றன. 🌡️

🏝️ கடற்கரைகளைக் கைவிட்டு மலைகளைத் தேடும் பயணிகள்

சுற்றுலாப் பயணிகள் தற்போது கடற்கரைகளைத் தவிர்த்து, ஐரோப்பாவின் உயரமான மலைப் பிரதசங்களை நோக்கி நகரத் தொடங்கியுள்ளனர். ‘Heidi’ நிறுவனத்தின் இணை நிறுவனர் மார்கஸ் பிளண்ட் (Marcus Blunt) விடுத்துள்ள தகவலின்படி, ‘ஆல்பைன் கோடைகாலம்’ (alpine summer) என்ற கூகுள் தேடல் ஆர்வம் கடந்த ஆண்டுடன் ஒப்பிடுகையில் 82 சதவீதத்தால் அதிகரித்துள்ளதாகத் தெரிவிக்கப்பட்டுள்ளது. அதேவேளை, ஐரோப்பிய பயண ஆணைக்குழுவின் (European Travel Commission) 2026 ஆம் ஆண்டுக்கான முதற்கட்ட அறிக்கையின்படி, கணக்கெடுக்கப்பட்ட 6,000 பேரில் 15 சதவீதமானோர் தங்களின் சுற்றுலாத் தளத்தைத் தேர்ந்தெடுப்பதற்கான இரண்டாவது முக்கிய காரணியாக ‘மிதமான, ஸ்திரமான காலநிலை’ என்பதையே குறிப்பிட்டுள்ளனர். 🧳

‘Generator’ நிறுவனத்தின் சந்தைப்படுத்தல் துணைத் தலைவர் அன்னாஜேன் குசெல் (Annajane Güzel) கூறுகையில், தங்களது முன்பதிவுத் தரவுகளும் ‘கூல்ஹொலிடே’ (Coolcations) மீதான ஆர்வத்தையே காட்டுவதாகக் குறிப்பிட்டுள்ளார். “பயணிகள் ஐரோப்பாவின் வெப்பமான கோடைகாலத்தைக் கைவிட்டு, இதமான காற்று வீசும் ஸ்காண்டிநேவியக் (Scandi) கோடைகாலத்தைத் தேர்ந்தெடுக்கின்றனர். இதில் கோபன்ஹேகன் (Copenhagen), ஸ்டொக்ஹோம் (Stockholm) மற்றும் டப்ளின் (Dublin) ஆகிய நகரங்கள் முன்னிலையில் உள்ளன. ஜூன் மாதத்தில் கோபன்ஹேகனில் 89.5 சதவீதமும், ஸ்டொக்ஹோமில் 87.1 சதவீதமும், டப்ளினில் 82.2 சதவீதமும் சுற்றுலா விடுதிகள் நிரம்பியிருந்தன” என அவர் மேலும் தெரிவித்துள்ளார். ✈️

#tamilklik #tamil #tamilnews #coolcations #climatechange #europeantourism #uktravelers #travelnews #breakingnews #lankatamil